ପାନୀୟ ଜଳର ଅଭାବ ର ବିକଳ  ଚିତ୍ର : ଶୋଷ ମେଣ୍ଟାଉଛି ଚୁଆ ପାଣି

0
23

ନାକଟିଦେଉଳ :  ସ୍ଵାଧୀନତାର ଦୀର୍ଘ ସାତ ଦଶନ୍ଧି ପରେ ମଧ୍ୟ ଗ୍ରାମରେ ଗୋଟିଏ ହେଲେ ନଳକୁପ କିମ୍ବା କୂଅଟିଏ ନାହିଁ । ବାଧ୍ୟହୋଇ ଗ୍ରାମ ନାଳରେ ଚୁଆ ଖୋଳି ପିଇବା ପାଣି ସଂଗ୍ରହ କରୁଛନ୍ତି । ଏପରି ଏକ ବିକଳ  ଚିତ୍ର ଦେଖିବାକୁ ମିଳିଛି ସମ୍ବଲପୁର ଜିଲ୍ଲା ନାକଟିଦେଉଳ ବ୍ଳକ ପାଣିମୁରା ଗ୍ରାମପଞ୍ଚାୟତର ଦୁର୍ଗମ ତଥା ପାହାଡ ତଳି ଗ୍ରାମ ଗରିଆଖମଣର କଟାସାହିରେ । କଟା ସାହିରେ ଆଜକୁ ପ୍ରାୟ ୪୦ ବର୍ଷ ପୂର୍ବରୁ ୧୨ଟି ଆଦିବାସୀ ପରିବାରର ପ୍ରାୟ ୫୦ରୁ ଅଧିକ ଲୋକ ବସବାସ କରୁଥିଲେ ।

ତେବେ ଏହି କଟାସାହିକୁ ଭଲ ରାସ୍ତାଟିଏ ନଥିବା ବେଳେ ବିଶୁଦ୍ଧ ପାନୀୟ ଜଳର ଘୋର ଅଭାବ ପରିଲକ୍ଷିତ ହୋଇଛି । ଏଠାକାର ଲୋକେ ପ୍ରାୟ ଏକ କିଲୋମିଟର ନାଳକୁ ଯାଆନ୍ତି ପାଣି ଆଣିବାକୁ । କାଖରେ କଅଁଳ ଛୁଆ ଏବଂ ମୁଣ୍ଡରେ ଗରାଧରି ଡହଡହ ଖରାରେ ପ୍ରତିଦିନ ଚାଲିଚାଲି ପାଣି ମୁନ୍ଦାଏ ଆଣିବାକୁ ଯାଇଥାନ୍ତି । ଖରାବର୍ଷା ଶୀତ ସବୁ ଦିନେ ଏହି ନାଳ ପାଣି ପିଉଛନ୍ତି ସାହିର ଲୋକେ । ଏଥିଯୋଗୁଁ ବହୁ ସମୟରେ ବିଭିନ୍ନ ରୋଗରେ ପଡି ସେମାନଙ୍କ ଦେହ ଖରାପ ହେଉଛି ବୋଲି ଅଭିଯୋଗ କରିଛନ୍ତି ଗ୍ରାମବାସୀ । ଏନେଇ ସରପଞ୍ଚ ଠାରୁ ବିଭାଗୀୟ ଯନ୍ତ୍ରୀ ପର୍ୟ୍ୟନ୍ତ ସମସ୍ତଙ୍କୁ ଜଣାଇ ଥିଲେ ମଧ୍ୟ କେହି ସେମାନଙ୍କ ଗୁହାରି ଶୁଣୁ ନାହାଁନ୍ତି ବୋଲି ଅଭିଯୋଗ କରିଛନ୍ତି ।

ବର୍ତମାନ ଖରା ଯେତିକି ବଢୁଛି ଏହି ବ୍ଲକର ବିଭିନ୍ନ ଗ୍ରାମରେ ପିଇବା ପାଣିର ସେତିକି ସମସ୍ୟା ଦେଖାଯାଉଛି । ବିଶୁଦ୍ଧ ପିଇବା ପାଣି ଟୋପାଏ ପାଇଁ ବର୍ଷ ବର୍ଷ ଧରି ଘାଣ୍ଟି ଚକଟି ହେଉଥିବା କଟାସାହିର ଲୋକଙ୍କୁ ସରକାର କେବେ ବିଶୁଦ୍ଧ ପାଣି ଟୋପାଏ ଯୋଗାଇ ଦେବେ ତାହା ଦେଖିବାକୁ ବାକି ରହିଲା ।

LEAVE A REPLY

Please enter your comment!
Please enter your name here